ليه بتقول على نفسك وحش وانت ف الأصل بتكون حلو ؟!! والعكس برضو؟!؟

طيب نقول ف الأول ايه تعريف النضارة:-
النضارة دى هى حلقة الوصل بين عينك وخلايا المخ .. هى الوسيط بينك وبين الناس اللى حواليك .. بمعنى؟!
عينك هى نضارتك .. وعلاقتها ب خلايا المخ إنك مثلاً لما تلاقى اللى حواليك بدإو يشكروا فيك وكدا تبدأ تفكر هما ليه بيقولوا كدا ؟!.. وفرضاً إنك عرفت الإجابة وقتها هتلاقى نفسك بتحسن النقطة اللى عجبتك الناس عندك وبكدا ده ليه علاقة بخلايا المخ .. طبعاً والعكس صحيح بس فى ناس لما تلاقى اللى قدامها مثلاً بتقول عنهم كلام وحش بيعملوا حاجه من الاتنين .. ي اما يعتزلوا اللى حواليهم وميتعاملوش ي أما يحاولوا يثبتوا العكس ..

طيب دلوقتى قولنا حاجتين ومفيش علاقة بينهم .. ايه المعنى أو الغرض من الكلام ده كله؟!!
مثال بسيط للتوضيح:-
دلوقتي واحد اسمه محمد اتعاملت معاه وكان كويس ومحترم معاه .. كدا دى وجهة نظرك انت عنه .. طيب جيه محمود كلمك عن محمد وقالك عنه حاجات وحشة وفرضاً إنك اقتنعت بكلامه بالتالى انت هتكره محمد مع انك مشوفتش ده منه !!!

طيب أسئل سؤالين واجابتهم انت تقولهم مع نفسك:-
ليه كرهت محمد وهو متعاملش معاك وحش؟!!
ليه بصيت لمحمد من وجهة نظر محمود ومبصتش من وجهة نظرك الشخصية ؟!!

النضارات ليها مقاسات .. ولما تلبس نضارة غيرك الرؤية مش هتكون واضحة معاك لأنها مش مناسبة ليك ..

اللى انا عايز أقوله ان المشكلة مش ف ان الشخص اللى قدامنا وحش ولا حلو .. المشكلة ف العين اللى بنشوف بيها.. هتشوف الناس بعينك انت ولا بعين غيرك .. ليه تمشى ورا كلام الناس ف حين ان إلى حد كبير بيكون غلط -ده إذا مكنش كله غلط- .. الرؤية أو النظر لحاجه تكون ملكك أنت مش ملك لغيرك .. خلى الحاجات الحساسة ف حياتك تكون على مقاسك لا اصغر ولا أكبر علشان متخسرش كتير

متشوفش نفسك بنضاره غيرك ومتشوفش غيرك بنضارة الناس