هل كلنا قادرين نخرج من الدوامة البشرية اللى احنا عايشين فيها ؟!!

طيب ايه هى الدوامة دى أصلاً !؟!
الدوامة هى عبارة عن دايره أنت بتلف فيها .. الدايره دى بتكون بدايتها يوم ما تتولد ونهايتها يوم وفاتك .. طبعاً كل شخص ليه دوامة معينة بيلف فيها مع نفسه حتى لو حياته اجتماعيه وبي share كل حاجه مع الناس اللى حواليه .. بس برضو دى ف حد ذاتها دوامة انت عايش جواها .. بإختصار الدوامة دى زى المتاهة الكبيرة بالظبط دخولها سهل والخروج منها صعب ومش كله بينجح ف انه يخرج منها ..
وطبعاً كل شخص ليه دوامة كبيرة عبارة عن مجموعة دوامات صغيرة..

طيب هو أنا مُجبر عليها يعنى دى؟!!
انت مش مُجبر على حاجه .. بس كل حاجه ف حياتنا تدريجية .. انت بتدخل الدوامة دى بالتدريج وانت مش مُدرك لكدا .. هتعرف انك ف دوامة لما تدخلها وتبدأ تحس بالارهاق فيها...

طيب نقول مثال بسيط جداً وسهل وأغلبنا عايشينه دلوقتى لو مكانش كله:-
انت دلوقتى طالب جامعى وفرضاً إن كليتك 4 سنين .. ف انت مطلوب منك كل يوم تصحى تروح كليتك وتحضر محاضراتك أو الانشطة على حسب انت بتقضى وقتك ازاى!! وبعدها ترجع البيت مطلوب منك تذاكر محاضراتك أو تجهز للانشطة اللى انت مشارك فيها أو لو عندك track انت ماشى فيه وتنام وتصحى تانى يوم الصبح على هذا القبيل بإختلاف بسيط ف بعض تفاصيل يومك .. بتفضل على الحال ده فترة الكلية كلها .. خلصت كلية ودخلت جيش هتفضل ف دوامة الجيش لحد م تخلص .. تخلص جيشك ومطلوب منك تجهز نفسك علشان تكون أسرة جديدة .. هتبدأ تحس انك دخلت الدوامة دى لما تكون بتتعب فعلاً وشغال على نفسك لان اللى مش بيتعب ف هو كدا كدا الدوامة هى اللى بتحركه براحتها بدون أى مقاومة منه .. بمعنى؟!!
المعنى انك انت مش هتحس بيها إلا لما تبدأ تشتغل على نفسك أو انك تفكر ف روتين يومك اللى مش بيتغير أبداً ..

طيب الخروج من الدوامة دى ازاى؟!!
في اللى بينجح أنه يخلص ويعرف يطلع من الدوامات للأمان وفيه اللى بيفضل محبوس جواها لحد ما يموت
خلينا متفقين إن الموضوع عادى وكتير كانوا عايشين فيها وكتير عايشين فيها دلوقتى وكتير هيعيشوا فيها .. الموضوع مش سهل علشان ف يوم وليلة كل الناس من صغرهم يبعدوا عن الدوامات دى .. بس ف نفس الوقت مش مستحيل ..
الموضوع مش ف دوامة ولا اتنين .. الفكرة إن حياتك كلها عبارة عن دوامات .. وكل م تخرج من واحدة تدخل ف التانية .. بس الفكرة كلها انك تخرج من الدوامة وانت مُكتسب خبرات جديدة حتى لو خسرت حاجات كتير ف مرة منهم - ده ف حد ذاته مكسب- .. واتعلم ف كل مرحلة انت تعبت ف ايه علشان متتعبش فيه تانى ف المرحلة اللى بعدها .. والخروج منها ده بيكون مُعتمد عليك انت مش على حد تانى .. كل واحد ليه طريقة خاصة بيعالج بيها مشاكله ومش معنى ان طريقة نفعت مع غيرك ومنفعتش معاك يبقا الطريقة غلط اطلاقاً .. بمعنى؟!! ..
ينفع يبقا انت مقاس التيشرت بتاعك M وتشترى مقاس XL !؟!