هو كتر التفكير ممكن يوصل الشخص لمرحلة من مراحل الخوف "عدم الثقة بالنفس" او اكتئاب؟!

طيب ف الاول نقول ايه مفهوم التفكير أصلاً لان أغلب الناس متعرفش هى بتفكر ازاى أو دماغهم شغاله ازاى!! .. بمعنى؟!!
التفكير هو أى عملية بيقوم بيها العقل الواعى وليس العقل الباطن .. وده بيشمل كل حاجه انت بتعملها ف حياتك اصغرها 1+1 اللى هى مجموعهم ب 2 وكلنا حافظينها كمان بس كون انك قولت ان مجموعهم ب 2 يبقا انت فكرت حتى لو التفكير لحظى وأخد منك جزء من الثانية .. وحتى لو قولت انك حافظها ومش مستاهلة تفكير .. طيب م هى برضو محفوظة ف خلية من خلايا المخ وكون انك تجيب المعلومة اللى انت حافظها دى من خلية من حوالى 100 مليار خلية ف دماغك ده ف حد ذاته تفكير برضو .. طبعاً بيختلف طريقة التفكير من شخص للتانى وكل واحد بيفكر بطريقة مختلفة عن غيره

حياتنا كلها قائمة على التفكير وعلشان كدا كل واحد بيجى ف وقت معين ودماغه بتفصل من كتر ال load عليها ف التفكير .. سواء بسبب موضوع مدايقك أو ضغط شغل أو ضغط مذاكرة ..

طيب بعد م عرفنا ايه هو التفكير تفتكروا ايه هى أنواعه:-

  • 👈 التفكير الايجابى: وده التفكير اللى بيكون دايماً متفائل والتفكير ف الحاجات الكويسة دايماً - وده مش معناه انه عايش ف مجتمع خالى من المشاكل - بس بياخد المشاكل اللى بتحصله بالتفاؤل وببساطة وسلاسة جداً
  • 👈 التفكير السلبى: وده التفكير اللى شايف الدنيا جحيم ومقفلة قدامه دايماً وبيتعامل مع المواقف بتشاؤم وتعقيد .. يقعد يفكر ف مواضيع قديمة مثلاً ويحبط ف نفسه ويقفل يومه .. ويتخيل ف مواقف متتابعة وتكون محصلتش ف الواقع بس بيتخيلها وده بيحطه تحت ضغط نفسى كبير جداً وبيؤدى لخمول جسدى وعدم الرغبة ف انجاز اى حاجه من الواقع اللى عايش فيه .. لانه بيفرض على نفسه الخيال اللى معيش نفسه فيه .. وده بيخليك تحس بالضعف والخوف والاستسلام

طيب ازاى بقا نتعامل مع التفكير السلبى ده؟!!
فى كذا طريقة نعملها ف الموضوع ده بس عايزين استمرارية منك مش أكتر
  • 👈 حاجه مهمة جداً وبتعدى من كتير مننا .. الموقف اللى حصلك ده بيكون بإرادة ربنا .. خليك راضى على حكم ربنا .. ثق ف ربك هو أدرى بالأفيد لك .. ربنا عمره م هيظلم عبد من عباده .. كلها امتحانات ربنا بيحطنا فيها .. ربنا لما بيلاقيك بدأت تبعد عنه بيحطك ف مِحن علشان تفتكره وترجعله من تانى أو علشان يختبر مدى قوة إيمانك وصبرك .. 
  • 👈 تقفل عنيك وتاخد نفس عميق أكتر من مرة كدا .. وده بيديلك الهدوء الداخلى وبيقلل التوتر والقلق اللى بتكون فيه وقتها
  • 👈 من أهم الحاجات متخليش عندك وقت فراغ لان التفكير السلبى بيعشق حاجه اسمها أوقات فراغ
  • 👈 ابعد عن اى شخص بتلاقى كلامه بيدخلك ف مود الزعل معاه لسبب .. لانك لما تزعل حتى لو مش لنفسك تلقائياً هتلاقى تفكيرك السلبى بدأ يشتغل معاك وهتفضل مكمل ف مود الزعل وتدخل ف اكتئاب من تانى - ده على اساس انك خرجت منه أصلاً - 
  • 👈 غير مكانك اللى انت معتاد عليه ولنفترض انها اوضة النوم بتاعتك مثلاً .. بالتالى كل م تدخل الاوضة هتقعد تفكر وتفتكر مواقف حصلت معاك .. اقعد ف مكان تقدر تصفى فيه ذهنك وتبعد شويه عن اللى حواليك .. 


طيب نجاوب على السؤال الرئيسى للموضوع؟!!
اه كتر التفكير بيوصل الشخص لمراحل كتير جداً من الخوف أو الاكتئاب بس اهم حاجه نحاول نفصل ونغير التفكير بتاعنا والطرق سهلة بس محتاجه منك الاستمرارية مش أكتر ..

كل واحد فينا عنده هدف .. الوصول ليه صعب لكن مش مستحيل