الخوف

ليه بيكون عندنا نقطة الخوف من اننا نتعامل مع ناس جديدة ؟!!

طيب ف الاول نقول الخوف ده هو ايه اصلا:-

الخوف هو طيبعة فسيولوجية عندنا من صغرنا بس درجاتها بتختلف من شخص للتانى باختلاف السن والبيئة المحيطة ونوع الحاجة اللى بيخاف منها .. وطبعاً فى أنواع كتيرة من الخوف الموجودة حوالينا .. وطبعاً الخوف بيأثر ف معدل افراز الهرمونات .. وكمان أحياناً بتأثر ف بعض أعضاء الجسم زى مثلاً ممكن ناس لما تزعل تجيلها رعشة ف الجسم .. ناس تانية جسمها بيعرق .. ناس تانية جسمها بيبرد من الخوف حتى لو الجو حر وفى أنواع كتير لا حصر لها

وقت م بنحس بالخوف فى حاجات بتتغير تغير لحظى وقت خوفك زى:-

• 👈 اول حاجه هى زيادة نسبة افراز هرمون الأدرينالين
• 👈 زيادة سرعة ضربات القلب
• 👈 جسمك بيبرد وتحس برعشة ف الاطراف
• 👈 ضيق التنفس
• 👈 بتحس ب خنقة بتكون رخمة كدا
• 👈 بتحس بالعطش 
• 👈 فقدان القدرة على التركيز

انواع الخوف كتيرة جداً طبعاً مهما اتكلمت مش هعرف أكون مُلم بالموضوع كله من كل الجوانب بس هتكلم عن النوع المنتشر حوالينا كتير وهو:-

الخوف الاجتماعى:-

النوع ده من الخوف هو انك بتخاف من التعامل مع الناس اللى حواليك وده ليه اعراض كتير منها:-

• 👈 الشعور بالارتباك وتحس ان رجلك مش شايلاك من ع الارض
• 👈 بتلاقى الكلام مش راضى يطلع وعمال تتلغبط
• 👈 بتفقد تركيزك تدريجياً لحد م تفقده كلياً 
• 👈 وارد جداً لو انت ف موقف وخايف منه وانت مُطالب انك تكمله للاخر ممكن تدخل ف حالة إغماء

طيب ايه سبب الخوف ده:-

• 👈 الخوف من الرفض: فى ناس بتخاف من الرفض وده بالنسبالها بيكون موقف مُحرج جداً .. مثلاً واحد حب ينضم ل شلة جديدة مثلاً أو كيان جديد واترفض -مهما كانت طريقة الرفض- بيكون مُحرج جداً وخايف يتعامل مع الناس علشان محدش يضك عليه 
• 👈 الخوف من نظر الناس: بتخاف لما بتلاقى عيون الناس كلها مركزة معاه هو بس ف بيخاف انه يغلط وبالتالى تركيزه كله هيكون على انه ميغلطش أكتر من تركيزه على الموضوع اللى بيقوله وبالتالى هيتغلبط 
• 👈 الخوف من الانتقاد: فى ناس بتخاف من الانتقاد والكلام اللى بيكون من ورا الناس فى ناس بتخاف من التعامل مع ناس علشان بيكونوا قدامهم بيتصنعوا الود ومن وراهم بيقولوا أسوء الكلام

اللى عايز أقوله ان كل واحد فينا عنده حاجه بيخاف منها حتى لو نسبة الخوف منها قليلة ومش ملحوظة بس دايماً فى حاجه كدا مُرعبة ف حياة كل واحد مننا .. بس على نطاق الخوف الاجتماعى ليه حلول كتير جداً أهمها انك تكون عندك ثقة بنفسك ودى لوحدها لو اتوفرت عندك يعتبر مشكلة الخوف بنسبة كبيرة جداً اتحلت معاك .. طبعاً كلنا عارفين ان اى حاجه مش بتكون سهلة ف الاول بس برضو مش صعبة ولا مستحيلة .. مفيش حاجه صعبة مع المحاولة .. كونك بتحاول وبتفشل مرة واتنين وعشرة بتكون احسن من واحد مقتنع انه مش هيعرف وخايف من المحاولة .. محدش هيكسر حاجز الخوف اللى عندك غيرك انت .. اه ممكن الناس اللى حواليك تساعدك بس محدش هييجى لحد عندك ويساعدك إلا إذا حس انك فعلاً محتاج تغير من نفسك وبتحاول

الحياة فرص اه .. بس الفرصة مش هتيجى وانت قاعد ف البيت