احنا ليه بندور على السعادة ف حين إننا نقدر نصنعها؟!!

طيب ف الاول نقول هى ايه السعادة:-
السعادة ليها اكتر من تعريف واكتر من معنى .. والمعنى بيختلف باختلاف الشخص نفسه لأن كل شخص ليه بيئة مختلفة .. بس خلينا نقول المعنى اللى بيكون مُلم اللى هو إن السعادة هى إنك تعيش كل يوم على حاجه جديدة وأمل جديد ومتبصش وراك وتفكر ف اى حاجه عدت كانت سبب يأسك .. السعادة دى حاجه كلنا بندور عليها ونفسنا نوصل ليها .. بس زى م قولنا بتختلف من شخص للتانى .. شخص سعادته بتكون ف إنه قرب من ربنا وصلى كل الفروض اللى عليه .. شخص سعادته بتكون ف إنه يساعد اللى حواليه .. شخص سعادته بتكون ف لمة أهله أو أصحابه حواليه .. شخص سعادته بتكون ف إنه يلاقى مسدچات تفرحه على صراحه مثلاً .. شخص سعادته بتكون انه يكون مستنى مامته ترجع البيت علشان يشوفها .. شخص سعادته بتكون ف إنه يشوف حبيبه ويقعد معاه .. فى انواع كتير لا حصر لها بس الظروف المحيطة بينا دلوقتي شبه بتجبرك إنك تكتئب بس الكلام ده ف حالة إنك مستنى السعادة تيجي لحد عندك !!! .. بمعنى؟!!
السعادة مش لازم تستناها تيجى لحد عندك .. اصنع سعادتك بنفسك .. هتقولى الظروف اللى حواليا مش بتساعد على كدا .. بس انت لو هتفضل ورا حاجز الظروف يبقا متنتظرش إن السعادة تجيلك حتى ولو صدفة ..

هسئل سؤال وفكر فيه دقيقة مع نفسك
لو هتفضل مكتئب وقاعد ف اوضتك لوحدك مُنعزل هتجيلك السعادة منين؟!! 
متقرأش السؤال وتسيبه .. جاوب على السؤال ف دماغك .. إجابته هتحل ليك حاجات كتير وشبه هتحلها إنت بنفسك كلها ..

السعادة مش معناها إنك تبقا عايش كل يوم ف فرحان ومفيش مشاكل نهائى لا....
السعادة يعنى إنك تخلق لنفسك سبب للسعادة وسط زحمة الاكتئاب اللى حواليك .. وإنك تحافظ على ثباتك الانفعالى .. وخلى عندك تفاؤل بإن ربنا هيجبر بخاطرك .. وقت زعلك واكتئابك افتكر ذكرى حلوة مريت بيها ..

اللى عايزين نوصل ليه ف الآخر إن زى م انت بتدور على السعادة.. السعادة كمان بتدور على الإنسان .. بس بتدور على اللى يستحقها بس .. السعادة كلنا بندور عليها مع إنها بتكون قدامنا ومش واخدين بالنا .. زى م الفون يكون ف إيدك وأنت بتدور عليه حواليك .. السعادة انت المصنع الوحيد ليها محدش غيرك هيعملها .. دور على الحاجات البسيطة اللى بتفرحك وجمعهم واصنعها انت .. السعادة مش ف انك توصلها لاء .. السعادة ف المحاولة.....
الحياة بتوجع فينا .. بس ممكن ذكرى بسيطة تفرحنا