ليه غالباً أو بمعنى أصح دايماً الحقيقة مش بتظهر ف وقتها؟!!
ليه بتظهر وبتتعرف متأخر بعد م بيكون راح فيها ناس ظُلم؟!!

المجتمع المصرى ماشى بمبدأ "الناس بتزيط فين وأروح أزيط معاهم" إلا من رحم ربه طبعاً .. بس للاسف الناس اللى بتفكر بعقل البنى ادمين فعلا نسبة قليلة جداً .. ف لما بتحصل أى حاجه قدامنا من غير م نعرف ايه هى بنروح ما شاء الله جرى على طول ونتكلم ف الحوار ولا كأنه حصل قدام عنينا واحنا مشوفناش حاجه أصلاً .. ف المواقف دى بنمشى مع التيار زى م هو ماشى .. بمعنى؟!! ..

فرضاً فى عربيتن خبطوا ف بعض خبطة عادية على الطريق بس الاتنين "بيتخانقوا بالكلام" مع بعض وتيجى انت وغيرك وغيرك تروحوا داخلين وسطيهم وكل واحد يفتى برأى شكل وانتو اصلا مشوفتوش حاجه!! وف الاخر صاحب الحق مش بياخد حقه أو بمعنى أصح الحقيقة مش بتظهر وقتها ..

نفس المنهج ده طبقه على أغلب المواقف المختلفة ف حياتنا اللى بنمر بيها .. دايما صوت الحق مش بيكون مسموع ف الاول بس بنيجى بعد الموقف بالنتايج السلبية بتاعته م تحصل بنسمع الحقيقة .. وقتها بيكون اللى ظلمناه ف الموضوع ده وقت الهرى الفاضى اللى حصل قبل كدا نفسيته تعبت وممكن كمان لو معاه وظيفه ممكن يتفصل منها وقت المشكلة م حصلت .. وبعدها يطلع كان مظلوم ولما نحاول نرجعه الوظيفة تانى ممكن يرفض لانه نفسياً اتدمر وممكن يخسر ثقته ف اللى حواليه ولو الموضوع اللى اتظلم فيه ده حساس شويه هيبقا ماشى باصص ف الارض من الاحراج لان كل الناس هتبصله بصة اشمئزاز .. وكل ده حصل ليه؟؟؟ بسبب انك ماشى ورا الزيطة بتاعة الناس ومحاولتش تسمع صاحب الشأن وتعرف ايه اللى حصل .. بس افتكر انك وقتها كنت بتساعد على إن الحقيقة متظهرش حتى لو كان الغرض التهييس أو التحفيل .. 

اللى عايز اقوله من الموضوع لو موضوع مش تبعك او موضوع انت مشوفتهوش متتكلمش فيه وبس وخاصة لو كلمتك مُعتمدة وانك لو قولت كلمة الناس هتمشى عليها .. افتكر إنك لو قولت حاجه غلط فى ناس هتتأذى بسبب كدا ظُلم وانت اللى هتشيل ذنبهم 
حرام عليك نفسك وحرام عليك تظلم غيرك