هو الانطواء اكتئاب؟

هل كل شخص هادى ومنطوى لازم يكون مُكتئب؟!!

ف الاول فى فرق كبير بين الانطواء والاكتئاب .. الشخص الهادى او المنطوى بيكون كدا لاسباب كتيره جداً منها :-

• تقلب المزاج
• الحزن والزعل الكتير
• فقدان شخص كان غالى جداً
• الخجل
• الخوف والاحراج من الرفض سواء من أصدقاء أو شغل أو حبيب أو أى community 
• بُعد المسافات الجغرافية بين الاشخاص

ودى من الاسباب اللى بتكون الى حداً ما واضحة قدامنا بس فى اسباب بتكون ليها عامل كبير جداً ف كدا بس مش بتكون واضحة قدامنا زى:-

• الشخص بيكون حساس زيادة لنظرة الناس ليه سواء بتكبر أو استحقار أو نظرة مادية
• حرج من كون إنه مش معاه فلوس زى اللى حواليه
• لغة الحوار بتكون عائق كبير جداً ف انه يتعامل مع اللى حواليه .. لغة الحوار انت ممكن تكون شايفها سهلة جداً بس هى مع الشخص المنطوى بتكون صعبة عليه جداً جداً .. ف الحالة دى مش هيكون فى أى تواصل فكرى بينه وبين اللى حواليه ف بيكون الانطواء المخرج الاسهل ليه من الحرج ده
• تشوه خُلقى أو فى جينات زيادة عنه غير مرغب فيها موجود فيه من صغره زى النحافة أو التُخن أو انه يكون قزم مثلاً وطبعاً الشعب المصرى مش فالح ف حاجه غير التنمر على خلق الله
• تربية الاسرة نفسها .. ممكن الاسرة يكونوا مربيين أولادهم من صغرهم على انهم يبعدوا عن أى حد وميبقاش عندهم ثقة ف اللى حواليهم .. ف هيكبروا وهما عندهم الرهبة من التعامل الخارجى مع البشر وهيبقوا شايفين التواصل مع العالم الخارجى عبارة عن حاجه مُخيفه تؤدى لهلاكهم .. ف بيلجأو للعزلة!!

وفى نوعين مختلفين من العزلة:-

• العزلة الايجابية: مثلا تراجع حساباتك .. تعمل لنفسك اجواء خصوصية ليك تغير بيها مودك .. تفصل أو تريح دماغك شويه من ارهاق فترة كبيرة من الضغوطات اللى حواليك
• العزلة السلبية: مثلاً تنعزل عن التواصل مع الناس .. تخلق لنفسك اعذار ومبررات تراضى بيها نفسك المريضة .. انك تكون متردد دايماً وملكش قرار حاسم ف أى موقف تتعرض ليه او تتحط فيه

اللى عايز أقوله من الموضوع إن مش شرط يكون الانسان المنطوى مُكتئب دى ممكن تكون طبيعته سواء عن طريق الوراثة أو صفة مكتسبة من الأهل اللى حواليه او بسبب ظروف معينة هو عايش فيها!!

مش كل شخص مُنطوى مُكتئب ومش كل شخص مُكتئب مُنطوى