هو ايه الفرق بين الوحدة والعُزلة؟؟

خلينا ف الاول نقول هى ايه العزلة ؟!
بإختصار شديد العزلة هى حاجه بتعملها بإرادتك .. بتنعزل عن الناس اللى حواليك كلها انعزال وانفراد تام .. وبيكون انفراد مادى ومعنوى .. مش بتكون وحشة بالعكس دى بتكون مريحه جداً للشخص لانه اختارها بنفسه وكمان بتديله الهدوء التام خاصة لو محتاج يفكر ف موضوع مهم ف حياته.!!

طيب ايه هى الوحدة؟!
بإختصار برضو الوحدة هى حاجه خارجه عن إرادتك الشخصية .. بتكون كاره الشعور ده .. احساس انك وحيد وحش جداً .. الوحدة ممكن تكون متمثلة ف كون ان حواليك ناس كتير بس برغم كدا بتكون وحيد .. الوحدة شعور معنوى وليست شعور مادى .. والوحدة ليها أضرار نفسية كبيرة جدا زى الاكتئاب اغلب الاوقات لأنه شعور بتكون زى اللى مُجبر انك تعيشه وقتها.!!

اسباب الوحدة:

  • 👈 مش بتكون قادر انك تتفاهم مع الناس المحيطة بيك
  • 👈 بتحس نفسك غريب عن المجتمع اللى انت المفروض عايش وسطيه أصلاً
  • 👈 مش بتكون راضى مثلاً عن الوضع الاجتماعى اللى انت عايش فيه
  • 👈 ممكن من كتر الصدمات اللى بتتعرض ليها تدخل ف حالات أمراض نفسية زى اليأس والاكتئاب
  • 👈 بتحس انك محروم من العناصر الرئيسية زى الحرمان المادى أو الحرمان العاطفى او غيره
اسباب العُزلة:


  • 👈 مش بتكون عايز تتعامل مع البيئة اللى حواليك بإرادتك
  • 👈 بتكون عايز تدى لنفسك مساحة من الخصوصية 
  • 👈 بتكون عايز تمارس أنشطة أو هوايات بتكون محتاجه هدوء تام زى اليوجا
  • 👈 بتكون عايز تبعد عن الناس اللى حواليك ومتتعاملش مع حد نهائى
  • 👈 ممكن يبقا عندك زهق وملل من الناس اللى حواليك أو الروتين اليومى بتاعك


اللى عايز أقوله ان أغلبنا فاكر ان الوحدة والعزلة نفس المعنى للتقارب اللفظى الوهمى بين الكلمتين بس لاء .. لو جينا نشوف الفرق هنلاقى أنهم يختلفوا عن بعض جداً .. وكمان الفرق كبير جداً بينهم .. وجه الشبه بين الاتنين انك بتكون لوحدك بس بيختلف شعورك ف كل حاله منهم.

مش كل شخص مُنعزل وحيد .. ومش كل شخص وحيد مُنعزل