العجز

هو الاحساس بالعجز بيكون صعب؟!

طيب ف الاول نقول ايه هو العجز:-

العجز هو انك تبقا عايز تعمل حاجه وحاجه مهمة وكبيرة ف حياتك بس بتلاقى الإعاقة جايلك من أقرب حاجه ليك مش بتكون انت السبب بس المحيط اللى حواليك هو السبب ف كدا .. 

طيب ايه هى أسباب العجز:-

الفقدان الواقعى .. الفقدان التخيلى .. الفقدان المتوقع

• 👈 الفقدان الواقعى: انك تكون شبه مسجون ف سجن الواقع المرير .. أو انك تفقد شخص عزيز عليك وانت مش قادر تتحرك ليه -ف حين انه غالى عليك جداً- .. أو فقدان وظيفتك .. أو اى خسارة كبيرة ف حياتك عامة...
• 👈 الفقدان التخيلى: ان عقلك الباطن يفكرك بمواضيع قديمة تعجيزية حصلت معاك .. تشوف حد حصل معاه موقف وحش وتلاقى دماغك بتفكر وتحط نفسك مكان الشخص ده .. تفتكر مواقف حصلت معاك قبل كدا وكانت تعجيزية ومعرفتش تتصرف فيها وقتها بالتالى هتحس باليأس والعجز تانى كأن الموقف لسا جديد...
• 👈 الفقدان المتوقع: توقع إحساس انك ممكن تفقد شخص عزيز عليك للأبد ..توقع تغير ف ظروفك الإجتماعية .. أو توقع اى موقف كفيل يحسسك بالعجز...

طيب العجز هيسبب ايه:-

• 👈 الخمول الجسدى والخمول الذهنى تجاه اى حاجه حواليك .. بتلاقى نفسك مش عندك اى حماس تجاه اى حاجه حواليك .. ولا  هيبقا عندك احساس بأى خبر ممكن تسمعه سواء كان خبر حلو أو وحش 
• 👈 توقع الإحساس بالقلق بعدم القدرة على التغلب على الظروف المحيطة مما يؤدى إلى الدخول فى حالات أكتئاب 
• 👈 الدافع اللى كان عندك تجاه الموضوع اللى كنت عاجز فيه هيبدأ مع التدريج يقل لحد م الدافع يتمحى من حياتك من غير م تحس ب كدا 

اللى عايز أقوله ان الاحساس بالعجز أصعب إحساس ممكن تمر بيه ف حياتك .. وبيكون أصعب من الندم على حاجه معملتهاش .. لأن العجز بيجى ف أن الحل بيكون قدام عينك بس انت مش قادر انك تنفذه لمجرد الظروف المحيطة بيك .. أما الندم على حاجه انك مقدرتش تعمل حاجه لانك مش عارف تعملها ازاى!!

كل مشكله وليها إن شاء الله حل .. بس مشكلة عن مشكلة تفرق .. بس علشان تكسر حواجز العجز واليأس اللى عندك .. جرب طرق جديدة وتكون فعلاً تنفع لمشكلتك .. هتتعب وانت بتجرب؟؟! .. اه هتتعب وهتتعب جامد كمان لأن ده تعب ما بعد العجز .. عمره م هيكون سهل .. بس أفصل دماغك شويه .. ف فترات العجز انت طاقتك حرفياً بتنتهى .. ف انت مطلوب منك تفصل عن المحيط اللى حواليك علشان تقدر تكمل لقدام .. بس لما تكسر الحواجز دى وتوصل لهدفك بعد عجز طعمها بيكون أحلى من انك توصل لهدفك بدون تعب .. المهم ان الخوف ميبقاش مسيطر عليك وأنت بتجرب .. بس جرب طرق جديدة متجربش حاجات قديمة وفشلت فيها علشان متتعبش زيادة على تعبك .. 

لن أبرح حتى أبلغ 🖤