هى ليه الظروف جايه عكس م احنا عايزين؟!!

انت كنت مرتب خروجه معينة مع اصحابك بقالكم حوالى سنة مشوفتوش بعض .. وخلاص الدنيا تمم .. وجيت يوم الخروجه حصلت معاك حاجه بالصدفة خليتك تضطر انك متخرجش .. طبعاً هتكره نفسك وهتتخنق وتتقفل من اليوم..!

طيب خلينا نكون متفقين من البداية كدا إن مفيش حاجه اسمها صدفة .. كل حاجه ليها سبب .. كل حياتنا ربنا مرتبها لينا تمشى ازاى .. طبعاً ده مش معناه انك تسيب نفسك لأى حاجه تحصل وتقول دى ارادة ربنا .. لازم تاخد بالأسباب ..

طيب تعالى نقول مثال فيه لفة كبيرة شويه كدا بس ركز فيه شويه

انت عايز تخرج مع صاحبك ومش عارف تظبط معاه وقت ولا مكان وظروفكم مش مظبطة انكم تتقابلوا سوا...

انت شغلك ف محافظة القاهرة وأهلك عايشين ف الصعيد .. وفى واحد زميل والدك ف شغله بس هو راح القاهرة ونسى فلاشته ف مكان مُعين هناك وعرف كدا لما رجع الصعيد .. ف هو كلم والدك لانه عارف ان شغلك ف القاهرة وكدا وقاله انك تجيبله الفلاشة معاك...

انت رنيت على صاحبك - صاحبك ده من القاهرة - علشان تسئله على المكان بحكم إنه من البلد نفسها .. هو كان قريب منك ف نزلك علشان تروحوا المكان سوا .. بعدها اتمشيتوا شويه أو روحتوا على قهوة قعدتوا سوا مثلاً

طيب م انتوا اتقابلتوا وقعدتوا سوا أهو!!!!!!!
ف حين انكم مكنتوش متفقين ولا حاجه على كدا .. دى اتدبرت لوحدها بإرادة ربنا .. ربنا خلاكم تتقابلوا بسبب فلاشة واحد انت وهو متعرفهوش أصلاً .. ربنا دايماً بيسبب الاسباب .. ثق ف ربك هو أدرى بالأفيد ليك

مش يمكن لو اتقابلتوا سوا وقت م حاولتوا تظبطوها كانت حصلت مشاكل معاكم او تحصل مشكلة ف المكان اللى تنزلوه مثلاً وتلاقوا نفسكم دخلتوا ف الموضوع وانتوا مفيش علاقة تربطكم بالموضوع أصلا...

اللى عايز أقوله إن كل حاجه ليها وقت .. لو مجاتش انهارده هتيجى بكرا إن شاء الله
كل حاجه بتيجى بالسعى والتوكل على الله وليس التواكل