الانتحار

بنسمع عن حالات الانتحار شبه كل يوم تقريباً .. وطبعاً وقتها كل واحد بيحب يبين نفسه انه مفتى الديار المصرية وكان شيخ الازهر قبل كدا ويقعد يقول ده كافر علشان ارتكب كبيرة من الكبائر والتانى يقولك لاء ده انسان تجوز عليه الرحمة عادى .. ونفضل نتناقش ف حاجه ربنا بس هو اللى عالم بيها وربنا هو اللى بيحدد ده يدخل النار ولا الجنة مش انت!! .. طيب ليه نتكلم ف حاجة ف علم الغيب ونسيب الموضوع الرئيسى اللى مفروض نفكر فيه، هما ليه بينتحروا؟!!! .. ايه اللى خلاهم يوصلوا لمرحلة انهم خلاص عايزين يعملوا اى حاجه علشان يخلصوا من الدنيا وبيكون ف اعتقادهم انهم كدا ارتاحوا!! والله أعلم بيرتاحوا فعلاً ولا لاء بعد الانتحار - دى حاجه ف علم الغيب - .. 

بس سيبونا من الجزء اللى محدش عارف عنه حاجه غير ربنا و خلونا نتكلم ف الحاجات اللى ظاهرة قدامنا ف أرض الواقع .. 

الانتحار ده بإختصار هو يعتبر أكبرنتيجة لليأس اللى بيمر بيه الواحد ودى بيكون ليها أسباب كتير جداً وبتختلف من شخص للتانى بس الاسباب عامة زى

• الاكتئاب
• تعاطى المخدرات
• التغيرات المزاجية تبقا مبسوط وزى الفل وفجأة تبقا مخنوق ومكتئب
• الاضطرابات النفسية
• الظروف الاجتماعية
• الظروف الاقتصادية
• الضغوط من الناس اللى حوالينا
• الهوس بفكرة الموت او افكار العنف المختلفة
• تبدأ تحب العزلة وتنفصل عن المجتمع اللى حواليك
• توفر طُرق الانتحار المختلفة

واسباب تانية كتير ومش كلنا عندنا نفس قوة التحمل اللى بتساعدنا نعدى من المواقف اللى بتدايقنا ومش كلنا بيجيلنا اليأس من نفس الحاجه!..

طيب نعمل ايه علشان نقدر نخرج من الدايرة دى مثلاً 🤔

• نحاول نتكلم مع ناس كتير منبقاش منعزلين انعزال تام عن اللى حوالينا
• لو انت ف ظروف اقتصادية صعبة منبصش للى ازيد مننا .. نبص للناس اللى بتنام ف الشارع ف عز التلج وانت نايم ف البيت متغطى - دى اقل حاجه ممكن تفكر فيها وقتها -
• منحاولش نخلى عندنا وقت فراغ كبير لان وقت الفراغ هو اكتر وقت بتيجي فيه كل الافكار المتطرفة.. اشغل وقتك بأى حاجه بتحبها حتى لو هتتفرج على أفلام ومسلسلات فاضية
• لو بتتعاطى المخدرات حتى لو ف السر ، مش عيب تروح تتعالج منها، العيب انك ترفض او تتكسف من العلاج علشان قرايبك او اى حد ميقولوش عليك ده كان بيتعاطى مخدرات .. طيب يقولو ده بيتعاطى مخدرات ولا يقولو كان بيتعاطى؟! وعامة لو مشيت ورا كلام الناس مش هتطلع يوم لقدام .. كلام الناس لا بيقدم ولا بيأخر

فى طرق كتير تخرج بيها نفسك من الدايرة دى بس الفكرة كلها شوف ايه اللى مدخلك جوا الدايرة دى واعمل عكسه بأى طريقة تعجبك....

بس معنى ان الواحد يفكر ف الانتحار معناها انه شايف ان الحمل اللى عليه بقا أكبر منه!!! .. طب ازاى تقول ان الحمل اللى عليك اكبر منك وربنا قال فى كتابه العزيز ((  لَا يُكَلِّفُ اللَّهُ نَفْسًا إِلَّا وُسْعَهَا ۚ )) .. ربنا عالم بيك أكتر من نفسك ومش هيحملك حاجه فوق طاقتك .. كل م الحمل يزيد عليك افتكر الآيه دى افتكر ان مهما الحمل تقل عليك وانت خلاص تعبت وجبت أخرك افتكر ان ربنا مش هيحملك ازيد من طاقتك♥❤...