ليه اللى انا كان نفسي فيه محصلش زى م انا كنت مرتب ليه؟
ليه بعد كل التعب ده موصلتش للى كنت محدد ليه وقت معين أوصل فيه؟

مثال بسيط كدا :)
3 اشخاص محضرين ومرتبين لمؤتمر كبير جداً والمؤتمر ده ال 3 أشخاص دول شغالين عليه مدة طويلة حوالي 5 سنين .. يعنى بقالهم 5 سنين بينحروا ف نفسهم علشان يوصلوا لليوم ده .. وجات عليهم أوقات وكانوا بيستلفوا فلوس علشان يقدروا يطلعوا مُنتج أحسن وجات عليهم أوقات كتير وكانوا بيفكروا يسيبوا المشروع بسبب العقبات اللى وقفت قدامهم .. بس لما كان واحد منهم بيضعف الاتنين التانيين يشجعوه يكمل وهكذا مع كل واحد منهم .. والحمدلله الدنيا تمم وظبطت والدنيا مشيت ووصلوا لمستوى يأهلهم يقيموا المؤتمر اللى بيحلموا بيه بقالهم 5 سنين وفرحتهم متتوصفش وخلاص وصلنا ليوم المؤتمر .. واليوم ده كان ف ظروفنا اليومين دول وحظر بسبب الاحوال اللى بتمر بيها البلد .. فـ بالتالى اليوم اتأجل لأجل غير مسمى لدرجة اليأس واتلغي المؤتمر

طبعاً خلينا متفقين ان هما التلاتة ف اشد حالات حزنهم جداً بسبب ده ومنقدرش نقول غير كدا .. بس طريقه تعبير كل شخص منهم عن زعله غير التانى .. بمعنى؟؟

انت لو حبيت تقعد مع كل واحد منهم وتواسيه وتقوله خير ان شاء الله وربنا هيجبر بخاطركم لانكم تعبتوا والكلام ده ولما تيجي تقوله متزعلش كل حاجه بتحصل ف وقتها اللى ربنا كاتبه .. بيكون رده عليك وقتها أنا عارف ان كل حاجه ليها وقتها
تسئل نفسك سؤال: طب ازاى هو عارف ان كل حاجه ليا وقتها وازاى لسا متدايق؟؟

ال 3 اشخاص دول كل واحد منهم كانت شخصيته مختلفة عن التانى وطريقة تفكيره مُختلفة .. وده أثر على طرق تعبيرهم عن زعلهم:-

  • 👈 الاول: زعلان جداً ومخنوق والدنيا اسودت جداً ف وشه ومفيش حاجه ف دماغه غير ال 5 سنين اللى من وجهة نظره راح تعبهم على الفاضى لانه موصلش لهدفه ف الوقت اللى هو كان محدده .. ف حين انه عارف ان كل حاجه ليها وقتها .. بس هيفضل طول الوقت باصص للجانب المُظلم من الموضوع .. ولما تقوله يلا نكمل هيقولك علشان اتعب تانى وف الاخر ملاقيش نتيجة!!!
  • 👈 التانى: زعلان والدنيا برضو مقفلة معاه زى الاول بالظبط بس بيحاول يخرج نفسه من المود بإنه بيحاول يقنع نفسه بإن كل حاجه ليها وقتها علشان هو مُدرك كدا .. وبيحاول يبص للجانب المُشرق من الموضوع المؤلم ده .. ولما تقوله يلا نكمل هيقولك تمم ماشى بس مش هيكون عنده الشغف ولا الطاقة الكافية زى الاول بس هيحاول يرجع لطبيعته زى الاول علشان يكمل
  • 👈 التالت: زعلان ومخنوق بس ده فترة مؤقتة وهيرجع زى الاول أو أحسن كمان من حيث الشغف والطاقة اللى يشتغل بيهم .. وده مش برود مثً ولا عدم احساس بهول المصيبة .. طب ازاى كدا؟؟ .. سبب بسيط جداً الشخص ده مؤمن بإن كل حاجه ليها وقتها .. ومؤمن بإن ربنا لا يضيع أجر من أحسن عملاً .. وعارف إن مهما كانت اختياراته صح بنسبة 100%  فـ هو مؤمن إن ربنا اختياراته هتكون أصح من اختياراته مهما كان تعلقه بألامر....

 اللى عايز أقوله ان كل حاجه ليها وقت معين .. انت هتشتغل ف وقته .. وهتخلص الحاجه ف وقتها اللى ربنا محدده ليها .. والموضوع الفلانى بتساهيل ربنا هيخلص ف وقته .. والجوازة اللى انت بتحلم بيها هتحصل ف وقتها ان شاء الله ..
بس ده مش معناه إنك تقعد مكانك ومتعملش حاجه وتقول ربنا هيعمل كل حاجه ف وقتها .. الحاجه سواء هتيجى ليك أو لا .. سواء هتيجي ف وقتها اللى انت محدده أو لاء .. مش هتجيلك وانت قاعد مكانك هتجيلك بالسعى والمحاولة .. متقعدش مكانك وتقول أصل ربنا مش رايد إن الحاجه دى تحصل .. ده غلط جداً جداً
كل حاجه ف حياتنا ليها وقت مٌعين .. والمشكلة ان كلنا عارفين الكلام ده .. بس فى فرق بين 3 حاجات كونك مجرد عارف المعلومة وكونك مٌدرك للمعلومة وكونك مؤمن بيها
ف المثال اللى قولناه فوق احنا قولنا ال 3 أنواع دول بالترتيب:-

  • 👈 الاول: مجرد انه عارف ان كل حاجه ليها وقتها 
  • 👈 التانى: عارف ومٌدرك إن كل حاجه ف وقتها
  • 👈 التالت: مؤمن إن كل حاجه ليها وقتها
الثقة والايمان بالله هو نص الطريق والسعى الصحيح هو النص التانى