البساطة

طيب ف الاول نقول ايه هى البساطة:-
البساطة ببساطة يعنى الوضوح والسلاسة والشفافية وأفضل من التواضع الكاذب أو بمعنى أصح مُدعى التواضع .. بس للاسف بقت نادرة جداً دلوقتى .. أو الناس البسيطة دى بمعنى أصح مش بيفضلوا على طبعهم من بشاعه العالم اللى حواليهم .. دلوقتى بقينا بنتسابق مين يظهر قدام الناس انه غنى أكتر .. مين يظهر قدام الناس انه شخصية اجتماعية أكتر .. مين يظهر فى المناسبة الفلانية انه كان واكل الجو .. وللاسف ممكن الواحد يعمل كدا حتى لو على حسابه الشخصي سواء مادياً او معنوياً..

  • 👈 الحساب المادى: وده ف حتة انك ممكن تستلف فلوس من حد علشان خاطر تجيب بيها حاجه تحضر بيها المناسبة الجاية علشان يتقال ده فلان كان أحسن واحد ف لبسه .. ده باين عليه غنى والكلام العبيط ده اللى ملهوش اى صلة بالواقع اصلا
  • 👈 الحساب المعنوى: وده ف نقطة انك ممكن تيجي على نفسك وحساب صحتك ف مقابل انك تظهر ف الحتة الفلانية .. او علشان يتقال ده فلان كان موجود وعمل كذا وكذا وكذا
اه عارف انك هتقول ان كل الناس مش كدا .. كلامك صح بس للاسف نسبة قليلة جداً الناس البسيطة دى اللى واخدين الامور ببساطة

- بس انا بالنسبالى موضوع البساطة ده عادى جداً .. بس وضعى الاجتماعى ميسمحليش ب انى اتعامل بأقل منه
= حلو جداً .. طيب نقول موقف بسيط جداً....
الرسول صلى الله عليه وسلم ف يوم جاله رجل جائع جداً .. الرسول بعت لزوجاته علشان يجيبوا ليه أكل .. الرسول كان بيرسل كل زوجة منهم لوحدها وكانت النتيجة إن كلهم مكانش عندهم غير مايه بس ومكانوش متفقين مع بعض ولا حاجه انهم يقولوا ان مفيش غير مايه بس .. وقته وشه محمرش من الخجل ولا اتحجج بحاجه مثلاً حفظاً لماء الوجه ولا الكلام ده كله .. ولا زوجاته صلى الله عليه وسلم قالوا مثلاً الناس هتضحك علينا أو هيتكلموا علينا .. زى م بيحصل معانا اليومين دول للاسف وأعتقد بتحصل معانا كلنا

الغرض من الموقف بعد م قرأته ممكن تجاوب على سؤال .. أنت مين جنب الرسول صلى الله عليه وسلم علشان تقول مكانه اجتماعيه وكلام الناس اللى هيفرقوا معاك؟؟؟

الفكرة كلها ف الرضا بالمقسوم.. مثال بسيط جداً
انت دلوقتى شخص حالتك الاجتماعية عادية متوسطة ومعاك عربية لانسر وشوفت واحد ماشي ف الشارع معاه عربية فيرارى مثلاً .. وانت مرة واحدة تسئل نفسك -ليه يارب انا مش غنى زايه ومرزقتنيش بعربية زايه؟؟- ..

طيب نسئل سؤالين صغيرين كدا:-

  • 👈 هل ربنا عاجز عن إنه يرزقك بالعربية دى مثلاً؟؟ طبعاً لاء .. بس خليك مؤمن بـ (وله فى ذلك حكم) .. ربنا أكتر حد عارف ايه الصح ليك وايه المُوذى ليك .. وخليك مؤمن بإن ربنا عمره م هيأذى عبد من عباده .. 
  • 👈 انت عارف ان فى ناس نفسها تركب عربية حتى لو فُسحة خمس دقايق بس .. لانهم عمرهم م ركبوها .. بس انت معاك النعمة دى
احنا كلنا ربنا رازقنا بنعم كتير أووى واحنا مش حاسين بيها والله ولا بقيمتها وابسط حاجه وكلنا بنمر بيها حالياً وهى نعمة الخروج من البيت .. كنت مُدرك ان دى نعمة؟؟ .. كنت مُتخيل إنك ف يوم من الايام تتحبس ف بيتك ومتعرفش تخرج منه؟؟.. حسينا بالنعمة دى لما قعدنا ف البيت

احنا ف ايدينا نعم كبيرة وكتيرة أووى واحنا مش حاسين بقيمتها للاسف .. البساطة كلها ف انك تعيش ف وسط النعم اللى ربنا مغرقنا بيها .. 
البساطة انك تعيش ف نعيم نعمة البساطة....
الحياة أبسط من انك تعيش عمرك كله بتعافر علشان بتتصنع