مين فينا معندهوش شخص ف حياته كدا أو الشلة اللى هو سافر المريخ مرتين وجيه ف يوم كدا أخدها جرى من القاهرة لأسوان ف 3 ساعات وكان من العلماء اللى اكتشفوا الفيمتوثانية ومن أبرز رواد مجال صناعة الاراء ودرب أغلب الخبراء اللى حصلوا على جايزه نوبل ف علوم الكيمياء والرياضيات والفلك والتاريخ .. طبعاً انت نسيت أصلا انى كنت بسئل ;)

طيب ايه تعريف الفيلسوفاتى ده:-
احنا مش هنقول التعريف الحرفى ليها احنا هنقول التعريف الحركى ليها وهو الشخص اللى عارف كل حاجه وفاهم ف كل حاجه ومحدش فاهم غيره وكل اللى حواليه مستواهم أقل منه وطبعاً رأيه هو الاكثر حكمة و رزانه .. وطبعاً كل ده من وجهه نظره هو مش رأى بنى آدم طبيعي يعنى أكيد....

مثال بسيط :)

مثلاً ف مجال التكنولوجيا والبرمجة اربع اشخاص ربنا رزقهم بمعلومة زياده عنك:-

  • 👈 الاول:  خلى المعلومة لنفسه واكتفى ب كدا .. وده عادى جداً
  • 👈 التانى: بيديلك المعلومة اللى هو عرفها علشان يفيدك بيها وتفيد بيها غيرك ويبقا أخد ثواب صدقة العلم .. ودى أفضل حاجه
  • 👈 التالت: بيتكبر ويشوف نفسه عليك بالمعلومة دى ويحسسك انه عرف اللى محدش عرفه .. وده بيكون نقص وبترجع لأسباب نفسيه بس مش مبرر برضو
  • 👈 الرابع: ده مش بيتكبر عليك بالمعلومة اللى معاه بس لاء ده بيعملك عرض حلو اووى .. ده بيحسسك انه عرف كل حاجه ف اى حاجه ف اى زاوية ف اى اتجاه .. وانه أجمد واحد ف مجرة درب التبانة والمجرات المجاورة .. ويحسسك من كلامه انه عايز يقولك انا كنت من شهود العيان وقت م كان ستيف جوبز مؤسس شركة آبل بيكتب وصيته .. وكان هشتغل ف فيس بوك بس اختلف مع مارك زوكربيرج على الشرط الجزائي .. وشركة جوجل طلبته وكانوا بيتحايلوا عليه بس هو مكنش فاضي و وراه مسئوليات ورفض
الشخص ده بيكون مريض ب مرض ال *أنا* يعنى مش شايف حد جمبه .. هو اللى فاهم وهو اللى عارف كل حاجه وأى حد يختلف معاه ف الرأى يبقا مش بيفهم .. وهو دايماً رأيه صح عمره م بيغلط .. هو اللى دايماً وجهه نظره صح .. ف حين إن للاسف بيكون أكتر شخص غلط واكتر شخص مش فاهم حاجه لان ببساطه شديده جداً الفهم بيجي من التعلم من الاخطاء السابقة .. الفهم الصح مش انك متغلطتش الفهم ف انك تتعلم من اخطاءك القديمة .. لكن كونك مقتنع ب انك عمرك م هتكون غلط يبقا عمرك م هتفهم ولا عمرك هتكون محبوب اطلاقاً لو انت فاكر ان الحاجه دى ممكن تخليك محبوب وسط ناسك يبقا انت بتوهم نفسك بحاجه غلط

اللى عايز اقوله ان كلنا بنغلط وكلنا بنقع وعادى جداً الحياة كلها ما هى إلا اننا نقع ونقوم ونفضل نقع ونقوم من جديد لحد أخر يوم ف حياتنا .. هى دى سُنة الحياة .. محدش معصوم من الاخطاء كلنا بشر وبنغلط وهنفضل نغلط برضو بس المهم اننا نتعلم من غلطنا ف كل مرة نغلط فيها مش انك تعافر وتقول لاء انا مبغلطتش ..

انت كـ واحد شايف نفسك غرضك كله انك تلفت نظر اللى حواليك علشان تقول *هاى أنا موجود* وبصراحه انت هتنجح ف دى جداً وهتلفت نظرهم بس متفرحش أووى يعنى لان دى هتبقا وجهه نظر سلبية مش ايجابيه اطلاقاً....

محدش هينبهر بيك لما تقعد تقول انك مبتغلطتش وانك دايماً صح .. لان محدش هيقتنع بكلامك علشان كلنا مُقتنعين اننا بنغلط ومحدش معصوم من الغلط