امتا اخلص بقا من الكلية وقرفها؟؟
امتا اتخرج بقا من المخروبة اللى انا فيها دى؟؟
امتا اكون سينيور بقا؟؟
كتير مننا بيفضل يسئل نفسه الاسئلة دى وشايف ان الكلية هم كبير وأيام تقيلة جداً بيمر بيها

الكلية كلها ما هى الا فترة ضغط نفسي واكتئاب وعلاقات كتير بتفشل مع أشخاص بتعرفهم ف المرحلة دى .. وكل يوم بتشوف نفس الناس وبتطرد من نفس المحاضرة .. وحياة شبه روتينية

طيب فكرت قبل كدا تبص لمرحلة الكلية من جانبها الحلو ؟؟
طيب انت تعرف ان مرحلة الكلية عيوبها ولا حاجه بالنسبة لمميزاتها أصلاً؟؟
طيب انت تعرف ان فترة الكلية تعتبر أفضل مرحلة ممكن تمر بيها ف حياتك؟؟

فترة الكلية دى ممتعة من كل الجوانب حتى مشاكلها مُتعة .. حتى طردك من المحاضرة مُتعة بس طبعاً مش هتكون مُتعة ف وقتها لاء هتحس بالمُتعة بالسلبيات وقت م تتخرج لانك هتتمنى ترجعلها تانى مهما كانت حصلت معاك فيها مشاكل ومواقف مش حلوة بس هتلاقي نفسك مياله ليها جداً ..
طيب هى مُتعة ف مشاكلها ازاى؟؟
مثلاً طردك من المحاضرة .. لما تفتكر بعد كدا لما تتخرج ان الدكتور الفلانى طردك من المحاضرة هتلاقى نفسك تلقائي بتضحك وهتكون عايز ترجع للمحاضرة دى علشان تتطرد منها تانى ..

طيب هى المُتعة ف المشاكل بس؟؟
طبعاً لاء .. المتعة ف كل خطوة بتمشيها ف الكلية انت مش حاسس بقيمتها دلوقتى بس هتعرف بعد كدا اد ايه هى كانت كبيرة جداً .. بتعرف ناس جديدة .. بتشوف ثقافات مختلفة بحكم إن بيكون معاك ناس من محافظات تانيه وكل بيئة ليها عادات وتقاليد مختلفة سواء من طريقة اللبس أو اللهجة أو الأمثلة الشعبية .. كل واحد قدامك بتلاقي دماغه غير دماغ التانى خالص .. فترة الكلية هى رحلة شيقة جدا جدا .. الكلية اللى كنت بتغيب فيها الترم كله ومتحضرش حاجه ولا تشارك ف اى نشاط ولا بتعمل حاجه وبتكون فاكر إن أنت كدا مكبر دماغك ومرتاح .. هتيجي بعد التخرج هتقول ياريتنى كنتى روحت .. ياريتنى كنت عملت .. كنت كنت كنت.....
طيب وليه تدخل نفسك ف الدوامة دى؟؟
ليه متستغلش كل دقيقة انت قاعدها ف الكلية وتستمتع بيها علشان متبقاش حارم نفسك من حاجه مش هتلاقيها بعد كدا ..

مثال بسيط :)
فى اتنين ف كلية واحدة مع بعض .. وكل واحد منهم ليه شخصيه مختلفة عن التانى نهائي ..
الأول: تفكيره شبه مجنون شويه اي حاجه بتيجي على دماغه يعملها بيعملها ولا بيفرق معاه كلام اللى حواليه وبيشارك هنا وبيروح هنا ويخرج هنا
التانى: تفكيره مش هنقول غرور بس اللى هو تحسه شايف نفسه كدا .. وطريقة كلامه كدا تحس فيها شيء من التكبر ومش هنقول مكتبر برضو .. بيهتم بنفسه وماشيته وطريقة كلامه مش علشان هو مُنضبط وكدا لاء ده علشان يلفت نظر الناس ويقولوا عليه الواد ده جامد ومفيش منه  .. وبيبص للشخص الأول على إنه عبيط واهبل ولسا مخرجش من ابتدائي والجو ده

طيب نسئل سؤال وانت ابقا جاوب عليه لنفسك
تفتكر مين فيهم لما يتخرج هيحس إنه خرج من مرحلة الكلية وهو ناقصه حاجات مستمتعش بيها؟؟

لو شايف إن الكلام ده غلط أو حاجه ف أنت ممكن تسئل أى حد متخرج .. متقولوش الكلية أحلى ولا التخرج .. ركز ف ملامحه ونبرة صوته وهو بيفتكر أيام الكلية وبيحكيلك عنها .. هتحس إنه بيحكيلك قصة أو مغامرة هو مر بيها ..
تفتكر أنت متستاهلش انك تيجي ف يوم وتحكى قصتك وانت فرحان؟؟
فترة الكلية مش أيام ف العمر دى أيام بالعمر