هو الوهم والعالم الافتراضي نفس المعنى؟؟
طيب ف البداية كدا خلينا نقول ايه هو الوهم :-
باختصار شديد جداً الوهم هو تضخيم الواقع لاضعاف كبيرة جداً ملهاش اى صلة بالحقيقة أصلا .. وبيكون ناتج عن تخيلات أو الظن والشك ..
طيب تمم جداً .. ايه بقا الوهم ده بالظبط بيعمل ايه يعنى؟!
طيب خلينا متفقين إننا عبارة عن كم معين من الطاقة .. وكل حاجه بتعملها ف حياتك بيكون من طاقتك دى .. الوهم ده بقا نوع تفكير سلبى وبيندرج تحت مسمى الامراض الروحية .. ومن وجهه نظرى بناءً على تجميع نتائج بعض المصادر انه نوع من انواع الاكتئاب النفسى ..
المُرعب فى الموضوع كله إن المرض ده يعتبر طبيعي للناس الكبيرة ف السن لانهم وقتها الاهتمام بيكون قليل ليهم جداً وده يعتبر شبه طبيعي فى العالم اللى احنا عايشين فيه دلوقتى .. لكن المرض ده دلوقتى بدأ يخترق الشباب بمعدل كبير وبدأ يتحكم ف تفكيرهم!!! -طبعاً مش كل الشباب- وده المرعب ف الموضوع دلوقتى....
طيب ايه اسباب الوهم ده:-
- 👈 الضغط النفسى اللى ممكن الواحد يكون فيه وتروح محوله من مجرد تفكير ف دماغك لشئ على أرض الواقع .. زى انك تفرغ الضغط ده فى اى حاجه قدامك مثلاً تكسر ف المراية او اى حاجه حواليك "وقتها بتكون موهوم إنك بالطريقة دى بتريح نفسك ف حين ان النتيجة عكسية وبتأذى نفسك"
- 👈 فى ناس بتحس ان عندها مرض مٌعين وهما معندهمش المرض ده .. بالتالى بيتخنقوا ويكتئبوا ويتوتروا من سبب ملهوش صلة بالواقع أصلاً
- 👈 سبب تانى وده بحد كبير بيكون عند البنات تقريباً بس وهو التركيز مع الجسم .. بمعنى؟؟ .. مثلاً لو متدايقه ممكن تتوهم وتشوف نفسها تخنت شويه وتقعد تقول انا تخنت، انا مش منتبهة لنفسى وهكذا .. وده طبعاً بيدخلها ف اكتئاب من مجرد وهم
- 👈 الخلو بالنفس .. من اخطر الاسباب ويمكن ده اللى اغلبنا عايشه اليومين دول بسبب الفترة العصيبة اللى بنمر بيها حالياً .. الخلو بالنفس بيسمح لعقلك ف التفكير والسرحان ف حاجات حصلت معاك وتبدأ تعمل سيناريو جديد عكس الواقع وتوهم نفسك بموضوع ملهوش صلة بالواقع .. خلينا متفقين ان سواء السيناريو ده كان حلو أو وحش ف هو ف الحالتين وحش .. ليه؟؟ .. لانه لو حلو وتيجى ترجع من العالم الافتراضى اللى انت بنيته ف دماغ للعالم الواقعى هتتصدم وتكتئب لان السيناريو ده محصلش .. ولو وحش هتكتئب برضو أكتر من المود اللى انت فيه أصلاً
- 👈 لما تكون انت شخص ناجح وليك character فريدة ليك ويجيي ف دماغك مرة واحدة احساس بالعجز والفشل ف حاجه حصلت معاك قبل كدا "ف حين انك عديتها بس سايبه معاك أثر" هتقعد تفكر من تانى فيها وترجع تقول على نفسك انك فاشل وعاجز .. بتقنع نفسك بمجرد وهم
- 👈 احنا قولنا انه من انواع الاكتئاب ف بالتالى ليه علاج مادى وهو مضادات الاكتئاب وطبعاً باستشارة طبيب نفسى متخصص
- 👈 الحل التانى وده الاهم وهو الحل المعنوى بمعنى أصح الحل النفسى .. الحل ده بيكون ف ايدك انت .. انت اللى بايدك تنهي حاجه زى كدا .. وانا مش هقول حلول لأن كل واحد وليه طريقه معينة يحل بيها مشكلته .. بس أبسط شئ انك تشوف ايه سبب المرض ده وأقضى عليه .. خلينا نتكلم عن السبب الحالى مثلاً وهو الخلو بالنفس .. الخلو بالنفس بيجيلك من الفراغ اللى بتكون فيه .. أشغل نفسك بأى حاجه تعملها .. حاول تفكر ف حاجات جديدة تعملها .. مثلاً تلعب رياضة ف البيت أو تشوف مجال برا مجال دراستك حابب تتعلمه و Go on .. الحلول كتير جداً بس مش أنا ولا غيرى اللى هيقولهالك .. انت الوحيد اللى عندك الحل لنفسك
كلنا عايشين ف وهم بس الأهم اننا نبقا عارفين اننا ف وهم حقيقي!!
0 تعليقات