ليه كله بيتكلم وبيفتى فى حاجه ملهوش علاقة بيها أصلاً؟؟
ليه الشعب كله بقا دكاترة وخبراء علاج الفيروسات النادرة؟؟
مبدأياً أنا مش هتكلم عن الجزء اللى واخد الموضوع لعب وهزار وتريقة لانهم مستهترين والتوعية مش نافعة معاهم!!!

بكل هدوء وبساطة ايه هو فيروس كورونا أصلاً:-
طبقاً لما صدر من مُنظمة الصحة العالمية إنه فيروس حيوانى المصدر .. بيتنقل من الحيوان للانسان والعكس صحيح طبعاً بس تعتبر النسبة الساحقة إنه بيتنقل من الحيوان للانسان ..

طيب هو وصل للوطن العربى عن طريق ايه :-
على مستوى الوطن العربى يُقال عن طريق الجمال وحيدة السنام .. لكن من وجهة نظرى لاء مش الجمال دى هى السبب!! .. نسئل نفسنا سؤال بسيط جداً .. هو احنا أول مرة ناكل لحم الجمال السنادى؟؟ .. أول مرة ناكلها السنة اللى فاتت مثلاً اللى قبلها؟؟ .. أكيد لاء طبعاً .. من قرون والعالم العربى بياكل لحم الجمال .. سبحان الله لحم الجمال جاى السنادى وتحديداً بعد الازمة اللى حصلت فى مدينة Wuhan الصينية ويبقا هو سبب الفيروس؟؟
ياريت ي جماعة قبل م نقول حاجه نفكر فيها شويه هل هى منطقية ولا لاء؟؟

دلوقتى جميع دول العالم فيها اشخاص صينيين أصلا والحركة بتاعتهم كتيرة جداً ف الحالة دى السبب واضح إن سبب الانتشار هو الاشخاص .. وسبب الانتشار ف الصين مصدرها الحيوانات .. ياريت نبطل هرى كتير فى كلام فارغ

العلاج المصرى لفيروس الكورونا:-

  • 👈 الفتى المصرى
  • 👈 الفزلكة اللى موجودة بالفطرة ما شاء الله
  • 👈 التفكير العقيم
فى علماء على مستوى عالى جداً من الخبرة على مستوى أنحاء العالم بيحاولوا يكتشفوا علاج للفيروس ده وربنا يعينهم جميعاً لانهم مُعرضين للخطر حالياً أكتر منى ومنك بسبب التعامل المباشر مع الفيروس وتيجي أنت بكل ثقة وتقول كام وصفة ثوم وبصل وكمون وكام حاجه تانيه من توابل الفراخ دى وتقول عليها علاج نهائي لفيروس كورونا .. اللى هو نعم؟؟ .. حضرتك دى وصفة تشوح بيها الفيروس متقتلهوش.

فى فرق بين الوقاية والعلاج .. اللى انتو بتقولوا عليه ده توعية للوقاية والله أعلم هى صح كمان ولا غلط مش هنتكلم فيها بما إن مفيش معلومة صحيحة عنها تثبت صحتها أو نفيها

 الوقاية المصرية من الفيروس:-

  • 👈 تبقا قاعد ف بيتك 24 ساعة مش بتتحرك منه ولا حد بيجيلك البيت وتحط كحول على ايدك كل شويه!! .. لا وكمان بعد م تحط كحول تروح تمسك الاكل وي سلام لما يكون كلور بقا .. انت مستوعب اللى انت بتعمله بس؟؟ .. ده تسمم لوحده ي جماعه انتوا بتتكلموا ف ايه!!
  • 👈 طول اليوم عمال ترش البيت مطهرات ومعقمات ومحدش بيجيلك من برا ولا انت بتطلع برا .. هو البيت اتفتح طريق لللاجئيين واحنا مش واخدين بالنا مثلاً .. اتعاملوا بحكمة شويه ي جماعة الله يباركلكم


العلاج الصحيح لفيروس كورونا:-
حتى الان لا يوجد علاج موثوق كامل الثقة للفيروس بشكل نهائى .. ولكن يُقال والله أعلم إن فى علاج أكتشفوه بيقضى على الفيروس فى أربع أيام والله أعلم من صحة الكلام ويارب يكون صح ونعدى من المحنة دى على خير بإذن الله ..

الوقاية الصحيحة للفيورس:-

  • 👈 اقعد ف بيتك الله يباركلك 
  • 👈 لما تنزل الشارع لموضوع ضرورى مش شرط تلبس كمامة ولا جوانتى عادى .. بس احفظ المسافة بينك وبين اى حد تتعامل معاه ومتلمسش اى اسطح عامة .. والفيروس مش بينتشر عن طريق الهوا الحمدلله .. الجوانتى والكمامات اللى انت بتستهلكها على الفاضي دى مش ليا ولا ليك .. خليها للى يستاهلها .. خليها للدكاتره والممرضين اللى عندهم عجز ف الموارد دى وهما أحق ناس يستخدموها لان بسبب العجز ده كتير منهم بيصاب بالفيروس .. اه كل شئ مُقدر ومكتوب بس احنا لازم ناخد بالاسباب
وده لينك مُنظمة الصحة العالمية فيها طرق الوقاية الصحيحة من الفيروس بإذن الله
https://www.who.int/emergencies/diseases/novel-coronavirus-2019/advice-for-public

« أَعُوذُ باللَّهِ وَقُدْرَتِهِ مِن شَرِّ ما أَجِدُ وَأُحَاذِرُ»