تفتكر الهروب من المشاكل اللى بتحصل معاك هو الحل؟؟
تفتكر لما تهرب دايماً من مشاكلك وتنسحب منها من غير م تواجهها هو ده الحل؟؟
تفتكر إنك لما تنام كل م تلاقي المشاكل بتدور ف دماغك ده الحل؟؟
ولما تقول انك جبت أخرك وطاقتك خلصت ومبقاش عندك طاقة لانك تحاول تساعد نفسك .. تفتكر ده بيكون صح؟؟
خلينا متفقين ف البداية ان الهروب من النفس بيكون حل لبعض المشاكل تمم .. بس ده بيدمر نفسك .. هنتكلم عنه بالتفصيل بس الموضوع محتاج شويه تركيز .. هنتكلم دلوقتى عن الاسباب ف حين ان كل واحد سببه مختلف عن التانى بس لان فى اللى بيكون ف الحالة دى ومش قادر يحدد هى ايه بالظبط
هى ايه اسباب الهروب من النفس:-
- 👈 الاحساس بالتقصير فى اى حاجه بتعملها وتقعد تأنب نفسك واللوم والتحقير للنفس
- 👈 الإحباط من كتر مرات الفشل ف انك تحقق أو توصل لحجاه معينة
- 👈 علاقة عاطفية كنت فيها واستهلكت فيها جزء كبير جداً من مشاعرك
هل زعلك وخنقتك واكتئابك لأى سبب منهم هو الحل؟؟ أو بمعنى أصح هل زعلك ده هيخلى الدنيا تبقا أحلى وترجع زى الاول؟؟
هات اجابة منطقية لنفسك انت على السؤال ده.
طيب ايه طرق الهروب اللى بيلجئ ليها اى حد بيهرب من نفسه:-
- 👈 الهروب من المشاكل بالنوم ودى أكتر طريقة شائعة فيهم
- 👈 الهروب لعالم الخيال والوهم واطلاق العنان للعقل الباطن لانشاء عالم افتراضى جميل تهرب فيه من الواقع المؤلم اللى حواليك
- 👈 الهروب عن طريق انك تشغل وقتك ف انك تشغل نفسك بتوصيل رسالة حلوة للى حواليك يفتكروك بيها وبيفرغ كل طاقته فيها علشان ميبقاش عنده طاقة للتفكير ف مشاكله
- 👈 الهروب عن طريق خلق مشكلة جديدة تشغل بيها نفسك بدل التفكير ف المشكلة الرئيسية وكدا انت بتخرج نفسك من تعب ل تعب تانى بس التعب التانى بيكون أخف بالنسبالك عن الاول
هقول حاجه محتاجه تركيز شويه .. فكر معايا كدا ف نقطة الهروب من النفس!!
مين الهارب؟ .. نفسك
مين المهروب منه؟ .. نفسك برضو
طب ازاى !! .. ازاى نفسك تهرب من نفسك .. هو الهروب مش معناه انك تبعد عن الحاجه؟! .. طيب ازاى هتبعد عن نفسك وهى معاك ف كل حاجه وكل موقف وهتفضل معاك لآخر يوم ف عمرك؟؟ .. جاوب على الاسئلة دى لنفسك شوف هتعرف تطلع اجابات منطقية تثبت ان الهروب من المشاكل أفضل حل!!!
حاجه بسيطة جداً .. لما بيكون عندك دور برد وبتاخد علاج ليه .. هل العلاج ده بطعم الفواكه؟؟ أكيد لاء طعمه مُر اه بس بإذن الله بتخف لما بتاخده ..
اللى عايز أقوله .. اه المواجهة هتكون صعبة بس صدقينى مش مستحيلة .. اه مُتعبة أنا عارف .. اه بتحس ان معندكش طاقة تكمل .. اه الظروف والبيئة حواليك مش مشجعاك ب 0.1% حتى،، لاء وكمان يمكن الظروف والبيئة اللى حواليك هى سبب تعبك .. بس لما ف الاخر تخلص مشكلتك بالمواجهة وقتها هتلاقى نفسك من ال power عندك عايز تدخل ف مشاكل تانيه علشان تواجهها من جديد علشان تحس بمجهود المواجهة دى لما تحلها ف الاخر
مش شرط تبدأ من دلوقتى لو مش قادر .. انت مش جبل .. ف الاول وف الآخر كلنا بنى آدمين وعندنا كم طاقة معين .. ممكن المواجهة مع نفسك تتأجل لو الحالة اللى انت فيها لو واجهت فيها نفسك ممكن تنهار .. اه آجلها لكن متهربش منها .. وتكون حاطط ف دماغك انه تأجيل مؤقت لحد م تلاقى نفسك عندها القدرة للمواجهة .. فترة التأجيل دى مش هتقضيها نوم وتقول خلاص هستنا لما نفسى تبقا تمم .. لاء انت الفترة دى تأهل نفسك للمواجهة دى ..
وأهم فترة هى فترة تأهيل النفس....
أهرب من الهروب من نفسك لنفسك
0 تعليقات