كل واحد فينا عنده شخص ميال ليه .. الشخص ده بيكون شبه المهرب الوحيد ليك .. حتى لو كانت شخصية وهمية .. فى اللى ممكن يخلق شخصية ف خياله وبيكلمها وبيهرب ليها من الواقع اللى هو فيه ..

الشخص ده أنت بتلاقي نفسك معاه .. حتى لو كنت طول الوقت زعلان هو مش بيمل من المحاولة انه يفرحك .. مهما اتعصبت وانفعلت وأنت بتتكلم معاه هيقولك كمل أنا سامعك .. أنت عيوبك بالنسباله... وايه كلمة عيوب دى أصلا .. انت بالنسباله معندكش عيوب أساساً حتى لو عيوبك دى محدش قابلها .. أنت بتكون بالنسباله وطن وهو بالنسبالك ملجأ .. اه انت وهو عايشين ف نفس الدنيا ونفس البيئة بس الشخص ده بيخلقلك دنيا تانيه جوا الدنيا اللى احنا فيها..

الشخص ده بتشوف صورته ف كل مكان وخاصة لو اماكن كانت بتجمعكم ببعض .. بيكون زى الطيف ف خيالك لو مش موجود قدامك .. بيكون موجود فى كلامك اللى بتكتبه وف أحلامك اللى مش بتبقا عايز تصحا منه لانكم مع بعض .. الشخص ده بيكون واخد دور كل شخص وكل حاجه ف حياتك .. بيكون دُنيتك..

الشخص ده اللى بيديلك سبب انك تتعب وتعافر مع حلمك .. لانه يستاهل المعافرة دى جداً .. و أوقات ضعفك وقت تعبك أول م تفتكره وتفتكر نبرة صوته المميزة جداً بالنسبالك بتنسا تعبك وكيانك كله بيقوم يكمل من جديد .. بيكون سبب سعادتك أو اكبر اسبابها جداً..

المخدرات حرام .. بس الشخص ده بيكون المُخدر الوحيد الحلال ليك
السرطان مرض جسدي .. بس الشخص ده بيجرى ف دمك وانت حابب كدا جداً
الجنون مرض نفسي .. بس الشخص ده بتكون مجنون بيه لحد الإيمان

أهم حاجة إن الشخص ده لما تلاقيه أعمل اللى تقدر واللى متقدرش عليه علشان تفضل معاه .. متضيعهوش من إيدك .. لأنها بتكون نعمة من ربنا ليك .. وأحنا لازم نحافظ على النعمة دى

معاك إنها ممكن تكون صدفة جمعتكم ببعض .. بس مفيش حاجه اسمها صدفة، كل حاجه بتحصل حوالينا ليها سبب