التغيير

ليه فكرة التغيير بتكون مُرعبة ف حين اننا مقتنعين بإن التغيير أمر طبيعي ف حياتنا؟؟

طيب ف الاول نقول هو ايه التغيير أصلا:-
المعنى الحرفى للكلمة دى انك بتغير حاجه من حالتها الطبيعية لحالة جديده ودى حاجه ثابتة ف حياتنا كلنا .. تغير طريقة لبسك مثلاً أو طريقة كلامك أو اسلوبك ف التعامل .. والمعنى الجوهرى ليها ليه أكتر من معنى بس نقول المعنى المشترك بينهم كلهم وهو إنك مشاعرك بتتغير أو اتجاهاتك أو ميولك لشخص أو حاجه معينة ..
علشان متفكرش كتير عن المعانى التانية هتلاقيها ف الكلام اللى جاى متستعجلش

التغيير كـ معنى هو حاجه حلوة لانه بيكون للأحلى لكن فى تغيير سلبى برضو .. كلنا عارفين ان مفيش حاجه كامله -الكمال لله وحده- ...

خلينا نتكلم عن كل نوع منهم لوحده على الهادى كدا:-

• 👈 التغيير السلبى: خلينا نبدأ بيه علشان مياخدش أكتر من وقته .. التغيير عامة بيحصل عن طريق ترتيب مُسبق وده الصح أو تغيير فجائي وده اللى تأثيره ممكن يكون عكسي وسلبى عليك .. ممكن بسبب مؤثرات خارجيه تأثر عليك تغيرك للأسوء زى مثلاً تبقا معدوم المشاعر أو حاجه حلوة كنت بتحب تعملها تكرهها ونفسك تقف منها وهكذا...
• 👈 التغيير الايجابى: وده بقا ليه أكتر من حاجه .. ده بيمشي بمبدأ التغيير عن طريق ترتيب مُسبق لانك بتكون عامل خطة هتمشى عليها علشان التغيير يتم بأفضل صورة ويكون تغيير للأحسن ..

خلينا مُتفقين ان التغيير قاعدة ثابتة ف حياتنا وعمره م هيتغيير .. أبسط مثال طقم خروج كان عندك السنة اللى فاتت بس السنادى انت جسمك بقا أكبر من السنة اللى فاتت .. هل هتلبس نفس الطقم؟؟ .. أكيد هتغيره وتجيب واحد مناسب لجسمك وكمان هتجيب حاجه تكون ماشيه مع موديل السنادى .. مش هتجيب حاجه موديل قديم وهكذا كل سنة .. 
يبقا انت كدا عملت 3 خصائص من خصائص التغيير وهما ان التغيير واجب عليك وانك طورت ف التغيير ده ..

• 👈 ضرورة التغيير: كان واجب عليك والا مش هتلاقى طقم تعرف تلبسه من القديم
• 👈 التطوير: وده ف حته انك جبت حاجه على موديل السنادى
• 👈 الاستمرارية: ودى ف حتة انك بتعمل كدا كل سنة

طيب ايه هى أنواع التغيير:-

• 👈 التغيير المخطط: وده فهمنا ان معناه اننا بنكون مخططين لتغيير معين بالخطوات اللى هنمشي عليها
• 👈 التغيير التدريجي: وده بيكون تغيير نفسي أكتر من تغيير طبيعي .. يعنى كـ تغيير نفسي بييجي مع مرور الوقت من مؤثرات خارجيه أو من البيئة المُحيطة .. وكـ تغيير طبيعي انه تغيير بيحصل مع مرور الوقت بس بيكون مُخطط ليه ف بتكون النتائج ف الاخر دقيقة جداً
• 👈 التغيير الكلى: وده ليه مفهومين الاول وهو التغيير المفاجئ وده اللى بيكون مش ف الحُسبان زى مثلاً انت نازل room ببجي مع اصحابك والواى فاى فصل ف انت تلقائى بسرعة قفلت الواى فاى وفتحت data علشان تلحق ترجعلهم ف ال game تانى .. والتغيير الجذرى زى مثلاً شركة كانت بتبيع مُنتج مُعين وفجأة غيرت المُنتج بتاعها بأسم وشكل ومواصفات تانيه علشان تنافس ف السوق 

التغيير فكرة حلوة ومفيش ثابته على حالها كل يوم كل حاجه بتتغيير .. مين كان يتخيل إن الطواف ف الحرم المكى الشريف يقف ساعة واحده بس مش يوم ولا شهر؟؟ .. لازم نكون مؤمنين بفكرة التغيير وخاصة ف الاشخاص .. محدش هيفضل زى م هو كله بيتغيير سواء للأحسن أو للأسوء الله أعلم بس اسمه أتغيير .. لما تلاقى حد قدامك اتغيير متستغربش عادى .. لو شايفه اتغيير للأحسن أدعيله ربنا يوفقه وينور بصيرته .. لو أتغيير للأسوء ادعيله ربنا يعينه ويرجع أحسن من الاول .. انت مش هتتغير للاسوء من فراغ .. مش هتحب ان الناس تقول عليك وحش .. بس دايماً حط نفسك مكان الشخص اللى تلاقيه أتغيير للاسوء وشوف نفسك تستاهل ايه وقتها واللى ترضاه لنفسك أعمله للى قدامك وقتها...

ليه فكرة التغيير بتكون مُرعبة ف حين اننا مقتنعين بإن التغيير أمر طبيعي ف حياتنا؟؟
بسبب التردد أو بسبب عدم ايمانك بالحاجه اللى انت هتتغير ليها .. انت لو مؤمن جامد بالتغيير لا هتحس برعب ولا خوف من التغيير ده متقلقش .. بس الفكرة ف قوة إيمانك بالتغيير ده كفيلة تقتل الرعب والخوف منه ولا لاء؟؟

والحاجة الوحيدة الثابتة ف حياتنا إن مفيش حاجه ثابتة ف حياتنا